Wednesday, May 23, 2012

பெட்ரோலிய விலை!.....விர்ர்ர்ர்ர்ர்ர்ர்ர்ர்!......ஏன்?, எப்படி?


மெனக் கெட்டு பதிவு எழுதுவதை விடவும், இது மாதிரி சட்டென தோன்றும் போது எழுதுவது சுலபமாயிருக்கிறது. 

இந்திய வரலாற்றில் இதுவரை இல்லாத வகையில், இன்று ஒரே நாளில் பெட்ரோல் விலை லிட்டருக்கு ரூபாய்.7.50 உயர்த்தியிருக்கிறார்கள். என்னுடைய அனுமானம் சரியாக இருக்குமானால்,இந்த விலை உயர்வினால் பெட்ரோலிய நிறுவனங்களுக்கு 10,000 கோடி ரூபாய் கூடுதல் வருமானம் கிடைக்கும்.

இதை எழுதிக் கொண்டிருக்கும் இந்த நிமிடத்தில் சர்வதேச சந்தையில் ஒரு பேரல் கச்சா எண்ணையின் விலை 90.70 டாலர். ஒரு பேரல் என்பது சற்றேறக் குறைய 159 லிட்டர்கள். அந்த வகையில் பார்த்தால் ஒரு லிட்டர் கச்சா எண்ணையின் விலை 0.57 சென்ட் ஆகிறது. டாலருக்கு எதிரான இன்றைய ரூபாய் மதிப்பு 55.90 என்று வைத்துக் கொண்டாலும் கூட ஒரு லிட்டர் கச்சா எண்ணையின் இந்திய மதிப்பு ரூ.31.90 தான் ஆகிறது. 

ஒரு லிட்டர் பெட்ரோலை சுத்திகரிக்க 6.00 ரூபாய் செலவு பிடிக்கிறது. ஆக மொத்தம் நிகர உற்பத்திச் செலவு 37.90 தான் ஆகிறது. ஆனால் இன்றைய ஏழரை ரூபாய் விலை உயர்வுக்குப் பின்னர் பெட்ரோலின் விலை 80 ரூபாய் ஆகியிருக்கிறது.

பெட்ரோலின் விலையை நிர்ணயம் செய்யும் உரிமையை அரசு தன்னுடைய கட்டுப் பாட்டில் இருந்து எண்ணை நிறுவனங்களுக்கு தாரை வார்த்த பின்னரே, எண்ணை நிறுவனங்கள் தன்னிஷ்டத்துக்கு விலையை அதிகரித்துக் கொண்டிருக்கிறது என்று எல்லா பழியும் எண்ணை நிறுவனங்களின் தலையில் விழுந்து கொண்டிருக்கிறது. உண்மையில் இந்த பிரச்சினையில் எண்ணை நிறுவனங்களுக்கு இனையான பழி அரசாங்கத்திடமும் இருக்கிறது.

ஒரு லிட்டர் கச்சா எண்ணையின் மீதான இறக்குமதி கலால் தீர்வையாக அரசு 15 ரூபாய் அளவில் வசூலிக்கிறது. அதன் பிறகு சுங்கத் தீர்வை என்கிற பெயரில் 7.5 சதவிகிதம் வசூலிக்கிறது.இப்போது இதன் மீதான மதிப்புக் கூட்டு வரி(VAT)/ விற்பனை வரி என்ற பெயரில் இன்னமொரு 20 சதவிகிதத்தை வசூலித்து விடுகிறது. ஒரே அரசின் வெவ்வேறு துறையினர் இந்த பணத்தை வரியாக வசூலிக்கும் அபத்தமான அரசாங்க அமைப்பு நம்முடையது.

பெட்ரோல் விலை(44.43)+ போக்குவரத்துச் செலவு(0.66)+மத்திய அரசு வரி (14.78 )+மாநில அரசு வரி(16.17)+ முகவர் கமிஷன்(1.50) = 77.54 (சென்னை விலை)

ஆக, கச்சா எண்ணையின் மீதான அரசாங்கத்தின் வருவாய் உறுதி செய்யப் பட்டுவிடுகிறது. எண்ணை நிறுவனங்களின் லாபம் உறுதி செய்யப் பட்டுவிடுகிறது. எண்ணை விற்கும் முகவர்களுக்கான கமிஷன் தொகை உறுதி செய்யப் பட்டுவிடுகிறது. இவை எல்லாமாய் சேர்த்து பயனாளர்களின் தலையில் 80 ரூபாயாக விடிகிறது.

யாரேனும் இது விஷயத்தை அரசிடம் தட்டிக் கேட்டுவிட்டால் இருக்கவே இருக்கிறது மானியம் தருகிறோம் என்கிற வழக்கமான சவ சவ பதில்தான் கிடைக்கும்.. மண்ணென்னைக்கும், எரிவாயுவுக்கும் இத்தனை கோடி மானியம் தருகிறோம் என்று சொல்லும் அரசு, அந்த பணத்தை நம்மிடம் விற்கும் பெட்ரோலிய பொருட்கள் மீது விதிக்கும் வரியின வருவாயில் இருந்தே கொடுக்கிறார்கள் என்பதை நாம் மறந்து விடக் கூடாது.

ஒரு பொருளின் மீதான அடக்க விலையின் மீது நூறு சதவிகிதம் லாபத்தை பல்வேறு வகைகளில் ஏற்றி விற்கும் கொடுமையை எங்கே போய் சொல்வது?. இதை எல்லாம் யார்தான் தட்டிக் கேட்பது?